AS INFANTÍS CAMPIONAS DE ESPAÑA!!! AS CADETES E OS XUVENÍS MEDALLA DE BRONCE!!!

Apuntade a data, 7 de xaneiro de 2015, porque sen dúbida o de hoxe é un día para lembrar. Un día no que se recolle o froito de moito e bo traballo durante anos dos clubs e dos técnicos e directivos da Federación Galega. É un día de colleita, pero tamén o é de sementeira. Estes éxitos de hoxe deben servir para reafirmarse no ben feito e aspirar a facer máis e mellor. Estes éxitos demostran que temos capacidade e saber facer para chegar ao máis alto. Son un éxito de todos os que traballaron por el: un éxito dos clubs, dos seus directivos, dos adestradores, dos compañeiros dos e das seleccionadas e seleccionados; un éxito da federación, da súa directiva e do seu director técnico; pero, sobre todo, é un éxito das rapazas e dos rapaces que integraron estas seleccións e dos seleccionadores que as dirixiron e os demais membros do equipo.

Hoxe podemos dicir felices e orgullosos que as nosas infantís fixeron á selección galega Campiona de España!!! E foi ao grande, derrotando na gran final ás anfitrionas, a Comunidade Valenciana, nun partido que dominaron inicialmente, no que chegaron ao descanso con vantaxe, no que viron como o seu rival conseguía empatar e no que non permitiron que lles pasara por diante, marcando novamente as diferenzas que, desta volta si, acabaron quedando reflectidas con xustiza ao final cun 25-22 que tinguía de dourado o nome das nosas xogadoras e do seu equipo técnico:

HELGA NÚÑEZ CHAPELA (C. BM. CANGAS);

UXÍA FERREIRO MONROY (A.D. CARBALLAL);

RUTH SÁNCHEZ FEIJOO (C. BM. PABELLÓN DE OURENSE);

SANDRA SÁNCHEZ FEIJOO (C. BM. PABELLÓN DE OURENSE);

SARA LÓPEZ COSTA (C. BM. LALÍN);

CELIA PEDREIRA JORDEDO (C. BM. LALÍN);

SANDRA BLANCO GARCÍA (C. BM. LALÍN);

SARAI ESPIÑEIRA SÁNCHEZ (A.D. CARBALLAL);

MARÍA LIDIA PORTELA CANCELAS (A.D. CARBALLAL);

ANA FERNÁNDEZ GÓMEZ (C. BM. CANGAS);

AITANA SANTOÉ SANTOS (C. BM. PORRIÑO);

ANDREA FERNÁNDEZ LOUREIRO (C. BM. SEIS DO NADAL);

ANTÍA PIÑEIRO IGLESIAS (C. BM. CANGAS);

ÁNGELA RODRÍGUEZ SUÁREZ (C. BM. SEIS DO NADAL);

GORETTI MIGUEL CRESPO (S.A.R.);

SILVIA LEIRAS ESTÉVEZ (C. BM. SEIS DO NADAL).

ALEJANDRO OCAMPO OCAMPO (SEL);

CINTHYA BELLO ESPIÑEIRA (AXTE);

MARÍA FRESCO SALGUEIRO (DEL).

As alegrías continuaron coas vitorias nas súas respectivas finais de consolación das seleccións cadete feminina e xuvenil masculina, que regresan a casa con senllas medallas de bronce.

As pupilas de Mónica Barreiro, a selección galega cadete feminina, fixéronse coa medalla derrotando con claridade ao conxunto castelán-manchego, co que xa tiveran oportunidade de enfrontarse na primeira fase. Desta volta, coa lección ben aprendida, a nosa selección colleu axiña o mando do partido e non o cedeu en ningún intre, chegando ao descanso cunha vantaxe de 6 goles (15-9) que incluso ampliou na segunda metade, chegando ao 31-23 final. PARABÉNS TAMÉN A ESTAS GRANDES CAMPIONAS!!!

Pola súa parte, a selección xuvenil masculina mantivo o elevado rexistro goleador que exhibiu durante todo o campionato e impúxose á selección madrileña, que estivo á altura e mesmo chegou por diante ao descanso (18-17). Na segunda metade, os homes de Luis Montes aumentaron a súa produción e acabaron vencendo por 33-40. Na celebración da medalla de bronce houbo unha dedicatoria especial a Miguel Casal, xogador do OAR da Coruña que desafortunadamente non puido formar parte da convocatoria e ao que tamén desexamos unha pronta recuperación.

As outras tres seleccións galegas, que xogaban polo 5º posto, tiveron sorte desigual. Unicamente a xuvenil feminina puido acadar o trunfo, impoñéndose a Navarra (25-21). Os infantís e os cadetes rematan en 6ª posición ao caer, respectivamente, fronte a Madrid (19-29) e Castela-A Mancha (42-36).

En resumo, o Campionato de España de seleccións territoriais 2015 representa un grandísimo éxito do balomán galego en todas as súas categorías, que lograron o obxectivo de permanecer na elite unha tempada máis e regresaron con dúas medallas de bronce e un título de CAMPIONAS!!!

AS INFANTÍS NA GRAN FINAL!!!

Sen desmerecer a actuación de ningunha das nosas outras seleccións participantes no Campionato de España que se está a celebrar en varias localidades castellonenses, o titular de hoxe ten que ser este: AS INFANTÍS GALAICAS XOGARÁN A GRAN FINAL!!!

As integrantes da selección galega infantil feminina voltaron ratificar o seu excelente traballo obtendo unha contundente vitoria diante dunha das grandes potencias do balonmán estatal, Cataluña, á que dominaron de principio a fin e á que deixaron ao remate a unha distancia de 10 goles (27-17), que expresa con toda xustiza o que foi o desenvolvemento do encontro e a diferenza existente entre o xogo de ambos os dous conxuntos.

Na gran final do campionato terán ocasión de desfacer o empate co que finalizou o último encontro da primeira fase, posto que o seu rival será a Comunidade Valenciana, anfitriona do torneo. O partido disputarase en Marina D’Or, ás 10:45 horas.

As outras dúas seleccións galegas que compareceron nas semifinais non puideron acadar o mesmo éxito e afrontarán mañá unha derradeira oportunidade de regresar con medalla, disputando as súas respectivas finais de consolación.

A selección galega cadete feminina, como xa advertimos, atopou un rival moi serio en Asturias. A selección do Principado impúxose por 29-25 e xogará a final ante Canarias. As nosas, pola súa banda, loitarán polo bronce con Castela-A Mancha, rival contra o que tamén pecháramos a primeira fase, sufrindo daquela unha axustada derrota por 21-23. Mañá, coa medalla como gran recompensa engadida, chegará a oportunidad de revancha, ás 10:45 no pavillón Víctor Cabedo de Onda.

A selección galega xuvenil masculina tampouco puido superar a rolda semifinal, pois topou no seu camiño co potente combinado catalán. Nun impresionante intercambio de goles entre as dúas seleccións máis realizadoras do campionato, o taboleiro de marcas elevouse ata un rexistro de 40-31 a prol de Cataluña, que dominou o partido dende o principio, grazas a efectividade do seu contraataque nos primeiros minutos, mantendo en todo momento unha cómoda vantaxe. Pasada esta páxina pensamos xa na final polo bronce, na que o noso opoñente será Madrid, ás 9:00 horas no Centro de Tecnificación de Vila-Real.

Os outros tres combinados galegos loitarán polo 5º posto logo de sairen victoriosos dos seus partidos de hoxe.

A selección galega infantil masculina gañou o seu encontro a Euskadi por 21-22. Mañá loitará por rematar en 5ª posición no campionato fronte a Madrid, no pavillón de Marina D’Or a partir das 12:30, no mesmo recinto no que con anterioridade as súas compañeiras disputarán a gran final da súa categoría.

A selección galega cadete masculina bateu con contundencia a Asturias (31-22). Mañá optará a concluir no 5º posto enfrontándose a Castela-A Mancha no pavillón Víctor Cabedo de Onda ás 12:30, e tamén terán a oportunidade de apoiar ás súas coetáneas que loitarán polo bronce na mesma pista.

A selección galega xuvenil feminina loitará polo 5º posto contra Navarra, ás 10:45 no Municipal de Onda. Chegou a este encontro logo de impoñerse por un claro 32-26 a Canarias no seu encontro de hoxe.

TRES DE CAL E TRES DE AREA: PASAN A SEMIFINAIS INFANTÍS E CADETES FEMININA E XUVENIL MASCULINA

Os cuartos de final do Campionato de España de seleccións atonómicas celebrados hoxe ofrecen un balance equilibrado para a expedición galega: tres grandes alegrías e tres pequenas decepcións (logo do brillante éxito que foi conseguir o primeiro obxectivo de pasar a esta rolda e consolidar un ano máis a presenza de todas as seleccións nas máximas categorías).

As alegrías viñeron da man das seleccións infantil e cadete feminina e xuvenil masculina, que acceden a semifinais.

As infantís, que comparecían invictas e coa condición de campionas do seu grupo de clasificación, enfrontáronse a Canarias, á que venceron por un contundente 29-16. As nosas ratifican con esta gran vitoria o favoritismo que lle conceden os prognósticos e agardan xa as semifinais diante do equipo catalán, que fora segundo no seu grupo e superou pola mínima (17-16) a Asturias, un dos equipos procedentes da Copa de España. A outra semifinal enfrontará a Valencia e Madrid, as outras dúas seleccións que se clasificaran por detrás nosa no grupo A.

Semifinal Infantil feminino: Galicia-Cataluña. Oropesa del Mar, 06.01.15 16:00 h.

As cadetes obtiveron igualmente o pase ás semifinais cunha brillantísima vitoria sobre Cataluña por 34-37. O próximo rival no camiño ao título será o Principado de Asturias, unha selección a ter moi en conta, pois malia chegar a cuartos dende a Copa de España foi quen de eliminar nesta rolda á anfitriona, a Comunidade Valenciana, que se presentou ao encontro logo de rematar como líder invicta no noso grupo de clasificación, endosándolle un inapelable 29-34. As vencedoras deste cruce enfrontarase na final ás do Canarias-Castela-A Mancha.

Semifinal Cadete feminino: Asturias-Galicia. Municipal de Onda, 06.01.15 16:00 h.

Os xuvenís tamén xogarán as semifinais cotra Cataluña, nun encontro que medirá as dúas seleccións máis goleadoras do campionato. Nos cuartos de final os nosos desfixéronse de Navarra, que viña da Copa de España, por 30-26. Pola súa parte, os cataláns, que xa dominaran con autoridade o seu grupo, asoballaron a Andalucía cun estratosférico 43-23. Na outra semifinal veranse as caras Madrid e Euskadi.

Semifinal Xuvenil masculino: Galicia-Cataluña. Centro de Tecnificación de Vila-Real, 06.01.15 12:00 h.

Menos fortuna tiveron as seleccións infantil e cadete masculina e xuvenil feminina, que logo de perder os seus respectivos partidos de cuartos de final deberán xogar polo 5º posto.

Os infantís foron superados por Canarias coa mesma claridade coa que despois serían vingados polas súas coetáneas (17-27). Agora optan a un 5º posto principiando por medirse a Euskadi, que procedente da Copa de España caeu coa Comunidade Valenciana. Os outros dous combinados que completan este cadro son Madrid e Aragón.

5º-8º (semi) Infantil masculino: Euskadi-Galicia. Marina D’Or, 06.01.15 10:00 h.

Os cadetes plantaron cara a un dos grandes favoritos, Cataluña, coa que sostiveron un intercambio de goles que elevou o taboleiro de marcas ata o 41-34 final, a prol dos cataláns. Tamén loitarán polo 5º posto a partir de mañá, enfrontándose en primeiro lugar ao Principado de Asturias, na que será a oportunidade de revancha da xornada inaugural, cando os veciños nos gañaran por 27-31. Os equipos procedentes da Copa de España, Aragón e Castela-A Mancha, completan esta parte do cadro.

5º-8º (semi) Cadete masculino: Galicia-Asturias. Municipal de Onda, 06.01.15 12:00 h.

As xuvenís foron derrotadas (33-22) pola grande favorita, Castela e León, que xa dominara con idéntica autoridade o seu grupo de clasificación. O obxectivo para as nosas a partir de agora vai ser o 5º posto, para o cal terán que loitar en primeiro lugar cunha selección canaria que foi eliminada pola mínima (36-37) por outra das grandes candidatas ao podium, Cataluña. Do partido entre Andalucía e Navarra, as dúas seleccións procedentes da Copa de España, sairá o seguinte e último rival do campionato.

5º-8º (semi) Xuvenil feminino: Galicia-Canarias. C. de Castellón, 06.01.15 10:00 h.

RIVAIS DAS NOSAS SELECCIÓNS FEMININAS EN CUARTOS DE FINAL

A 3ª e derradeira xornada do Campionato de España de seleccións territoriais culminou co éxito da clasificación dos seis combinados galegos para cuartos de final.

A quenda vespertina reservouse para as categorías femininas. As tres seleccións galegas xogaron os seus partidos ás 18:00 h, coa vantaxe de saberse xa clasificadas en función dos resultados rexistrados nos encontros das xornadas anteriores ou das súas compañeiras de grupo na primeira sesión da tarde, ás 16:00 h.

A selección infantil foi a que colleitou un mellor resultado esta tarde, empatando coas anfitrionas da Comunidade Valenciana a 26 goles. Con este resultado e as súas dúas anteriores victorias (ante Madrid e Navarra), as máis novas das galaicas acceden aos cuartos de final como líderes invictas do seu grupo. Nesta rolda eliminatoria enfrontaranse a Canarias, que concluíu en 3ª posición no grupo B, por detrás de Aragón e Cataluña, relegando a Andalucía a acompañar no descenso á Copa de España á selección de Navarra, pechacancelas no noso grupo.

Infantil feminino 1/4 final Galicia-Canarias (05.01.15 16:00 h Oropesa del Mar)

As cadetes sufriron unha derrota moi axustada con Castela-A Mancha por 21-23 e remataron a súa participación no grupo A en 3ª posición. O sorteo emparellounos en cuartos de final con Cataluña,  2ª do grupo B por detrás de Canarias e por diante de Andalucía e Madrid, que descende á Copa de España, como Euskadi.

Cadete feminino 1/4 final Cataluña-Galicia (05.01.15 16:00 h P. Víctor Cabedo-Onda)

As xuvenís tamén saíron derrotadas no seu partido de hoxe, por 32-29 con Cataluña, e conclúen o grupo en 3º lugar, por diante de Asturias, descendida. No cruce de cuartos agarda Castela e León, líder do grupo A e principal favorita ao título, xunto coas anfitrionas da Comunidade Valenciana, pois ambas as dúas seleccións contan os seus respectivos partidos por vitorias.

Xuvenil feminino 1/4 final Castela e León-Galicia (05.01.15 18:00 h Centro de Tecnificación Vila-Real)

RIVAIS DE CUARTOS DE FINAL PARA AS SELECCIÓNS MASCULINAS

Disputados na mañá de hoxe os encontros correspondentes á terceira xornada do Campionato de España nas categorías masculinas, vén de celebrarse ás 17:00 o sorteo para determinar os emparellamentos de 1/4 de final.

En xuvenil, o equipo de Luís Montes, malia colleitar a segunda derrota (25-30 con Andalucía), fixo valer o seu potencial goleador (anotou 100 tantos nas tres xornadas) para resolver a súa prol o triple empate con andaluces e casteláns-manchegos e acadar a segunda praza do grupo A, por detrás de Castela e León, que gañou os seus tres partidos. O rival dos nosos na eliminatoria de cuartos de final será Navarra, un dos dous equipos procedentes da Copa de España. Os navarros chegaron a este enfrontamento logo de remontar a Melilla a dobre partido (perderon 24-28 o primeiro encontro cos norteafricanos e gañaron o segundo 29-17) e superar no cruce a Aragón (20-24).

1/4 final, xuvenil masculino: Galicia-Navarra, luns 05.01.15 12:00 h en Castelló de la Plana.

En categoría cadete, a selección galega resolveu o seu partido con Canarias de xeito contundente (40-23), no que se convertera nunha auténtica promoción de permanencia no Campionato de España, posto que ambas as dúas seleccións perderan os seus partidos anteriores. Disipada a ameaza de descenso, o enfrontamento de 1/4 de final ante Cataluña, primeiros do grupo B con 3 vitorias e un asombroso promedio goleador (113 tantos; 37 goles por partido), amósase como unha oportunidade de medirse a un dos grandes favoritos ao título.

1/4 final, cadete masculino: Cataluña-Galicia, luns 05.01.15 10:00 h en Onda.

Os infantís, invictos  nas dúas primeiras xornadas, apañaron unha derrota ampla, aínda que sen consecuencias dramáticas, diante Madrid (31-16), xa que o empate previo entre os combinados de Aragón e Castela-A Mancha permitiulles rematar en segunda posición no grupo B. O sorteo deparou como rival a Canarias, que como no caso do contrincante da nosa selección xuvenil tamén procede da Copa de España, onde contou por triunfos os seus enfrontamentos con Extremadura e Cantabria e no cruce con Navarra, amosando unha gran superioridade nos taboleiros de marcas.

1/4 final infantil masculino: Galicia-Canarias, luns  05.01.15 10:00 h en Marina D’Or.

As seleccións femininas completan arestora a súa participación na fase de grupos (as xuvenís xogan contra Cataluña, as cadetes contra Castela-A Mancha e as infantís contra a Comunidade Valenciana). Os resultados dos partidos das 16:00 horas xa lle deron a clasificación para cuartos de final aos tres conxuntos, independentemente do desenlace dos seus respectivos encontros. O sorteo celebrarase ás 21:00 horas.

ASí VAI O CAMPIONATO DE ESPAÑA DE SELECCIÓNS

O pasado venres 2 de xaneiro principiaron en varias localidades da provincia de Castellón os Campionatos e Copas de España de seleccións territoriais das categorías infantís, cadetes e xuvenís, tanto femininas como masculinas.

Os seis combinados galegos de cada unha das categorías compiten nos seus respectivos Campionatos de España, é dicir, nos torneos reservados aos equipos máis potentes, segundo a clasificación obtida no ano anterior polos seus predecesores.

Logo da desputa das dúas primeiras xornadas as seleccións galegas optan en case que todos os casos a clasificarse para cuartos de final como cabezas de serie.

A selección infantil feminina lidera o seu grupo tralas dúas claras vitorias colleitadas fronte a Madrid, o venres (34-21), e Navarra, o sábado (20-28). A diferenza de 21 goles a prol permítelles afrontar con comodidade o derradeiro partido do grupo fronte á anfitriona, a Comunidade Valenciana, hoxe domingo ás 18:00 horas.

En infantil masculino Galicia ocupa o 2º posto na clasificación provisional, igualado a puntos co líder, Madrid, o seu próximo rival, logo de gañar a Aragón (27-25) na primeira xornada e empatar o sábado co combinado castelán-manchego (24-24). O partido cos madrileños xogarase hoxe ás 12:00 h.

En cadete feminino as nosas caeron na segunda xornada con claridade diante do cadro local, a Comunidade Valenciana (36-26), pero manteñen as opcións de clasificación intactas logo da súa contundente vitoria sobre Euskadi na xornada inaugural (27-20). O partido das 18:00 horas con Castela-A Mancha decidirá a clasificación final deste grupo.

A situación máis comprometida é a que ten que afrontar a selección cadete masculina, logo das dúas derrotas sufridas contra Asturias (27-31) e Andalucía (27-29). Aínda así, os rexistros goleadores dos nosos permítenlles afrontar o partido decisivo fronte a Canarias en vantaxe, de maneira que o empate cos do arquipélago daríalle a terceira praza do grupo.

Nunha situación máis favorable atópase a selección xuvenil feminina, que recuperou o terreo perdido tralo debut fronte ás valencianas, (coas que perdemos 24-29), cun amplo trunfo sobre Asturias (31-22), que deixa a resolución do grupo con todas as opcións abertas no choque das 18:00 h fronte a Cataluña.

Malia a derrota sufrida na segunda xornada con Castela e León (36-34), o equipo galego xuvenil masculino ostenta a condición de selección máxima goleadora do campionato, pois aos 34 goles acadados fronte aos castelán-leoneses na segunda xornada hai que engadir os 41 que lle encaixou aos castelán-manchegos na primeira (41-33). Malia todo, convén non confiarse, posto que Andalucía, vindeiro rival e pechacancelas do grupo, non será un rival doado. O encontro celebrarase ás 12:00 h.

GAÑAMOS AS ELECCIÓNS!!! (CARTA ABERTA AO BALONMÁN GALEGO)

Benqueridos amigos do Balonmán:

O pasado venres participáchedes na primeira elección presidencial nos 30 anos de historia da Federación Galega. A vosa asistencia masiva a este acto tan transcendente merece o meu primeiro agradecemento, pois mobilizar e dinamizar o balonmán galego foi un dos principais motivos que nos animou a presentar a nosa candidatura. Conseguir unha participación do 81%, con plena representación de estamentos tradicionalmente absentistas nos últimos anos (adestradores, árbitros e xogadores), déixanos unha sensación de éxito nese primeiro propósito.

Outro obxectivo que semella que tamén logramos foi o de poñer de manifesto que hai moita marxe de mellora, especialmente en áreas claramente deficitarias. Logramos que o Presidente electo recoñecese e asumise o noso diagnóstico da situación e fixese súas as máis importantes das nosas propostas: a necesidade de traballar doutro xeito, creando equipos que se responsabilicen das distintas áreas; a necesidade, tamén, de dotar á FGBM dun departamento de comunicación máis eficaz, de cara a ese obxectivo de incrementar a repercusión social do noso deporte; a imperiosa necesidade de reestructurar e potenciar as áreas técnica e arbitral. Nós fixemos o noso traballo de diagnóstico e de proposta e nos sentimos gañadores ao ver que se asumen os nosos criterios.

En definitiva, iso é o que nos importa: que o Balonmán progrese. Sabedes que en todo momento faleivos diso, do proxecto que pretendíamos desenvolver, das iniciativas que desexábamos levar a cabo, das áreas nas que queríamos traballar e como o queríamos facer. Que se faga é máis importante que que sexamos nós quen o faga. Incluso admitimos que pode haber quen o faga mellor que nós.

Confiamos na capacidade e na palabra de Pérez Ouro para, a partir de agora, poñerse a traballar neses aspectos, con esas novas formas e ánimos renovados. Conta ademais, co que ningún Presidente da FGBM nunca contou: o apoio explícito e aplastantemente maioritario do Balonmán. Tamén o noso. Nós estamos máis que satisfeitos con ter representado, na medida en que o puidemos ter sido, un elemento dinamizador, ter servido de toque de atención para evitar que a FGBM entrase nunha rutina decadente.

Estamos tamén moi satisfeitos da maneira en que puidemos desenvolver a nosa campaña e da acollida que tivemos pola vosa parte. Todos aqueles aos que acudín a presentar o noso proxecto recibíchedesme coa cortesía e amabilidade que agardaba, prestáchedesme atención e coincidíchedes comigo no esencial. As conversas que mantiven con vós resultáronme moi enriquecedoras e contribuíron a dar forma ao noso programa, no que puidéchedes ver recollidas as vosas inquedanzas. Só me laio de non ter podido chegar persoalmente a todos, e agardo que non o interpretedes en ningún caso como un desprezo. Os meus medios foron limitados (os meus recursos propios) e cheguei ata onde puiden.

Loxicamente, tamén quero expresar o meu agradecemento aos asembleístas que me honraron co seu voto. Síntome en débeda con eles. Agardo que lles compense o compromiso que o Presidente electo asumiu de traballar doutro xeito e volcarse nas áreas que sinalamos. A eles e a todo o Balonmán: MOITAS GRAZAS!!!

Emilio Pallarés.

CHEGOU O DÍA: HOXE ELEXIMOS PRESIDENTE!!!

Pasado o Nadal, por fin chegou o día de culminar o proceso electoral de renovación dos órganos rectores do balonmán galego coa constitución da Asemblea Xeral da Federación e a elección dos membros da súa Comisión Delegada e do Presidente para os vindeiros 4 anos.

Hai menos dun mes, o 27 de novembro, abrimos este blog coa intención de que nos servira de plataforma para expoñer o noso programa e presentar aos membros máis relevantes do equipo que nos acompañará durante o noso mandato á fronte da FGBM.

Coas máis de 2000 visitas recibidas durante este tempo, cremos que esa finalidade cumpriuse con creces. O balonmán galego puido ter acceso a través del ás propostas coas que queremos acadar os obxectivos da nosa candidatura. O balonmán galego puido saber a través del que somos un grupo de persoas inconformistas, desexosas de desenvolver moitas iniciativas. O balonmán galego puido coñecer a través del que existen alernativas e hai xente disposta a tirar adiante, que hai recambios no banco de reservas que poden entrar no terreo de xogo neste momento, especialistas en defensa e en ataque, capaces de recuperar e sair ao contragolpe, para gañar o partido, e de elaborar e culminar xogadas de fantasía das que crean afección. O balonmán galego puido a través del, en suma, ter elementos para contrastar as opcións que aspiramos á presidencia.

PROXECCIÓN INTERNACIONAL

O balonmán é un deporte aínda en expansión. A condición de disciplina olímpica que adquiriu a partir de Munich 1972 non representou unha imediata universalización da súa práctica na medida que cabería agardar, de maneira que ese proceso aínda está en marcha.

Unha marcha que se está a acelerar nos últimos anos, coa incorporación á escena inernacional de novas áreas emerxentes, que atraen a atención de xogadores e técnicos fóra do tradicional núcleo europeo.

Á irrupción do balonmán surcoreano masculino e, sobre todo, feminino a raíz da celebración dos Xogos Olímpicos en Seúl en 1988, semella que lle saíu unha réplica no Brasil que acollerá a Olimpiada en 2016, potencia rexional sudamericana que subiu un ou dous chanzos nas últimas citas mundiais.

Por outra banda, no Golfo Pérsico, ao calor dos petrodólares, estase a acrecentar o interese polo balonmán, como amosa o feito de ser Qatar o vindeiro anfitrión do mundial masculino en ás penas un mes.

Esta expansión territorial que está a vivir agora o balonmán ofrece oportunidades de traballo moi interesantes para xogadores e técnicos galegos, cuxa experiencia e capacitación pódese considerar como das mellores que se poden atopar no mundo. O nivel deportivo que acadou o balonmán no noso país nas últimas tres décadas, no que foi partícipe das competicións máis sobranceiras do mundo, avalan esta cualificación. Cómpre aproveitar este momento que coincide, ademáis, cun período de dificultades no interior, para establecer contactos e tecer redes de colaboración con estas áreas emerxentes coas que, ademais, existen outras vinculacións que facilitan a tarefa.

Neste senso, cabe sinalar que temos identificado tres áreas xeográficas prioritarias de intervención nas que o balonmán galego posúe vantaxes engadidas: a xa mencionada do Golfo Pérsico; América Latina; e a Comunidade de Países de Lingua Galego-Portuguesa.

En todas esas áreas posuímos bos contactos que debemos aproveitar para intercambios enriquecedores para ambas as dúas partes. Sen prexuízo das competencias que posúe a RFEBM, e en colaboración con ela, trataremos de establecer vías de cooperación con federacións de países desas e outras áreas que, entre outras cuestións, permitan visitalas cos clubs e seleccións galegas e recibir a visita de clubs e seleccións deses países, así como participar na formación dos seus técnicos e xogadores e procurar oportunidades de emprego para os nosos adestradores e deportistas profesionais.

FARO DE VIGO INFORMA DO PROCESO ELECTORAL

http://www.farodevigo.es/deportes/2014/12/23/asamblea-federacion-gallega-escoge-presidente/1154877.html

BALONMANO

La asamblea de la Federación Gallega escoge presidente entre Ouro y Pallarés

La decisión se conocerá el viernes tras una campaña de clima cordial

Redacción | Vigo 23.12.2014 | 01:53

Con la despedida de 2014 concluye el proceso de renovación en las distintas federaciones deportivas gallegas (en general con la reelección de los presidentes salientes). Pero aún queda por dilucidar el nombre del mandatario hasta 2018 de una de las principales, la de balonmano. Y habrá comicios. José Luis Pérez Ouro se presenta a la reelección. El exárbitro Emilio Pallarés Álvarez será su rival. La decisión está en manos de la asamblea extraordinaria, que se reunirá en la Casa do Deporte, en Vigo, este viernes a las 19.45 horas.

Es la primera vez en la historia del balonmano gallego que hay más de un candidato. Un hecho que no ha provocado una contienda áspera, al estilo de la que se ha producido en el fútbol entre Louzán y García Liñares. Al contrario, tanto Pérez Ouro como Pallarés, que fue vocal suyo en su primera junta directiva, han apostado por una campaña de perfil bajo y contactos discretos, sin acusaciones de grueso calibre hacia su adversario.

De hecho, Pallarés admite que el balonmano gallego ha progresado con Pérez Ouro a su timón durante los últimos ocho años. Le reconoce el incremento de practicantes, cifrado en alrededor de un 60 por ciento, y las ventajas que obtuvo de su estrecha relación con el anterior presidente de la Federación Española, Juan de Dios Román. Sin embargo, Pallarés considera necesario apostar por un cambio de rumbo en apartados como el arbitral y el técnico.

Lo cierto es que Pérez Ouro, que dejó entrever entre sus íntimos durante un tiempo que no se presentaría a la reelección, ha decidido optar a un tercer mandato. Pallarés, que dimitió como directivo federativo en junio de 2007, fue árbitro nacional entre 1998 y 2004, y miembro de la asamblea entre 2002 y 2006.

Pérez Ouro parte como favorito en las quinielas previas. Lo reconoce el propio Pallarés. «Las elecciones para representantes de los estamentos de árbitros, entrenadores y jugadores parecen otorgar una clara ventaja al candidato a la reelección», asume. Balonmán Cangas y Seis do Nadal Coia han trabajado a favor de Ouro. Pero Pallarés mantiene la fe en la victoria y explica por qué renunció a presentar candidaturas propias a la asamblea: «Todos los asambleístas son de los míos, no creo conveniente promover un enfrentamiento entre equipos que son pilares fundamentales del balonmano gallego y mucho menos sugerir siquiera la posibilidad de que se interpreten las elecciones como una lucha encarnizada por el poder. No es el poder lo que buscamos ni Ouro ni yo, sino ofrecer distintos proyectos, distintas maneras de entender por dónde debemos encaminar el futuro desarrollo de nuestro deporte en Galicia».